"Shpetojnë" vetëm Torriani, Gabbia, Comotto dhe Modric. Ruben Amorim i ka mbyllur eksperimentet dhe tani është koha për ndërhyrje drastike për të rindërtuar skuadrën. Humbja 3-0 ndaj Chelsea-t është një mësim mjaft i ashpër për Milanin, jo vetëm për atë që u pa gjatë 90 minutave, por për gjithçka që kjo miqësore nxori në dritë. Ruben Amorim dhe drejtuesit kuqezi morën përgjigje mjaft të rëndësishme: një pjesë e mirë e përbërjes aktuale duhet të shitet dhe të zëvendësohet me lojtarë që kanë uri, dëshirë dhe cilësi më të lartë. Dita e hënë nuk premton kohë për të humbur; do të ketë shumë punë dhe pak vend për deklarata pompoze. Koha e cut-it dhe vendimeve të guximshme ka ardhur, sepse gjasat janë që një minusvalencë në bilanc është më e pranishme sesa ruajtja e një klime të caktuar në dhomat e zhveshjes. Notat e kuqezinjve: Torriani 6.5: Te goli i parë mund të disktutohet nëse duhej të dilte më shpejt, por katër shokë skuadre (Estupinan, De Winter, Pavlovic dhe Comotto) krijuan konfuzion në zonë ku Joao Pedro përfitoi. Më parë bëri dy pritje vendimtare. Te goli i dytë ndoshta mund të reagonte te krosimi, ndërsa te i treti nuk kishte çfarë të bënte. Përgjithësisht priti çfarë ishte e mundur. F. Terracciano 5: Paraqitje konfuze. Te goli i dytë, së bashku me Saelemaekers, krijuan "korridorin" ku Joao Pedro u fut lehtësisht për të dyfishuar shifrat. (Nga min. 60' Vladimirov 6: Nuk shkaktoi dëme). De Winter 5: Joao Pedro i iku pas krahëve në golin e avantazhit të Chelsea-t në shtesën e pjesës së parë. Gabim mjaft i rëndë. (Nga min. 46' Gabbia 6: Dha ndjesinë se ishte i vetmi që e dinte se çfarë po bënte). Pavlovic 5.5: Palmer e nxori shpesh nga pozicioni. U ndëshkua me karton të verdhë dhe provoi një dalje në sulm në pak rastet që Milani krijoi në pjesën e parë. (Nga min. 46' Diawara 5.5: Duhet parë më me kujdes). Chukwueze 5: Përveç një krosimi për Camarda-n, ishte thuajse i padukshëm në rolin e anësorit të mesfushës. Palestra kishte tjetër ritëm ndaj tij. Në atë pozicion nevojitet një titullar që di të bëjë të dyja fazat. (Nga min. 46' Saelemaekers 5: Menjëherë gabim mbrojtës te goli i dytë. Jashtë forme dhe me shumë gabime). Modric 6: Mbuloi mirë krahët e Comotto-s kur ky i fundit bënte presionin e parë. U mundua t'i jepte frymëmarrje lojës dalëse, duke u ofruar gjithmonë si opsion pasimi. Provoi edhe një goditje fluturimthi nga jashtë zone. (Nga min. 46' Jashari 5.5: U përpin nga apatia e skuadrës). Comotto 6: I rreshtuar krah Luka Modric, u vu plotësisht në shërbim të kapitenit. Ishte mesfushori që ngriti presionin e parë ndaj mbajtësit të topit te Chelsea, duke e bërë këtë me kohëzgjatje të duhur. (Nga min. 46' Musah 5: Gabime në pasime dhe humbi ekuilibrin vetëm me topin). Estupinan 5: Nuk arriti të bënte pothuajse asgjë mirë. Kur duhej të krosonte kthehej në të djathtën, kur duhej të dilte në vertikalizim mbetej prapa Leao-s. Ndër emrat e parë që duhet të konsiderohen për largim. (Nga min. 46' Bartesaghi 5.5: Pak i dukshëm në fazën sulmuese). Loftus-Cheek 5: Nuk prodhoi asgjë. U shfaq gjithmonë i pasigurt për të ndërmarrë iniciativa. Ka nevojë për hapësira për të performuar, por loja në hapësira të ngushta nuk është pika e tij e fortë. (Nga min. 59' Ricci 5.5: Mbeti në mëshirë të lojës së Chelsea-t). Leao 5.5: Nuk arriti notën kaluese sepse nuk mori vendimet e duhura në sulm, por dha ndjesinë se ishte i vetmi me një ide ndryshe në lojë. Mori duartrokitjet e Amorim për angazhimin pa top. (Nga min. 46' Nkunku 5: Nuk bëri pothuajse asgjë). Camarda 5.5: I braktisur në sulm, ndonëse u përpoq mjaft për të hapur hapësira ndaj Wesley Fofana-s. Furnizimi me krosime apo pasime në zonë ishte zero. (Nga min. 46' Gonçalo Ramos 5.5: I mbetur pa topa nga mesfusha). Trajneri: Ruben Amorim 5: Faza mbrojtëse mbetet problem i madh: 6 gola të pësuar në tri miqësore ndaj Celtic, Inter dhe Chelsea. E shfrytëzoi këtë përbalje për t'i dhënë sinjale të qarta klubit për nevojat e skuadrës. Ka shumë punë për të bërë si në hyrje, ashtu edhe në dalje, ndërsa shqetësimi te kuqezinjtë vjen duke u rritur.