Mattia Zaccagni, sulmuesi i Lazios, është i pranishëm në konferencën për shtyp pas përfundimit të ndeshjes Lazio-Milan, sfidë e vlefshme për javën e katërt të Serisë A. Si ishte të përballeshe me Gilën? Ndihesh se je rikthyer te futbollisti që ishe para dëmtimeve? Jemi të kënaqur me paraqitjen. E dija që dueli me Gilën do të ishte i vështirë, ashtu si vitin e kaluar në stërvitje. Kam bërë një para-sezon shumë të mirë pa munguar asnjë stërvitje, jam i lumtur dhe po rikthej në formën fizike të dy sezoneve më parë. Sezona e kaluar ishte e vështirë me shumë dëmtime, jam i kënaqur dhe i lumtur. I konsideroni dy pikë të humbura apo një pikë të fituar? Ishte një pjesë e parë me të vërtetë me nivel të lartë ku e vëmë nën presion një skuadër shumë të fortë si Milani në çdo aspekt. Krijuam shumë, mund të kishim shënuar më shumë se dy gola. Në pjesën e dytë, nga ana tjetër, luajtëm pak më keq, u tërhoqëm dhe vuajtëm nga kundërsulmet e tyre. Barazimi ishte rezultat i drejtë. Si po të shkon puna me Gattuso? Me trajnerin kemi bërë një përgatitje shumë të mirë, duke punuar me buzëqeshje, kjo është e rëndësishme. Jemi të kënaqur me atë që po bëjmë, askush nuk e priste dhe duhet të vazhdojmë në këtë rrugë. Cila është receta për ta mbajtur Nuno Tavares në këtë formë? Kam parë atë që tha trajneri për Nuno, jam dakord sepse ai është një lojtar që potencialisht mund të luajë për Real Madrid. Ai po punon shumë mirë, stërvitet mirë dhe kjo duket në fushë.