E ardhmja e Santiago Gimenez te Milani mbetet e pasigurt. Sulmuesi meksikan, i cili qëndroi në Milanello për të rikuperuar formën fizike dhe për të rifituar besimin, mund të largohet nga kuqezinjtë vetëm pak muaj pas transferimit të tij. I afruar nga Feyenoord në janarin e kaluar me pritshmëri të mëdha, Gimenez e nisi mirë aventurën e tij te Milani, duke dhënë asist në debutim ndaj Romës dhe duke shënuar më pas në Serie A kundër Empolit dhe në Champions League pikërisht ndaj ish-skuadrës së tij. Megjithatë, dëmtimet e shumta dhe vështirësitë për të gjetur vazhdimësi bënë që sezoni i tij të kthehej në një zhgënjim. Sipas raportimeve, Porto e ka vendosur seriozisht në shënjestër sulmuesin 25-vjeçar. Trajneri Francesco Farioli thuhet se ka kontaktuar personalisht Gimenez për t'i shprehur vlerësimin dhe për t'i prezantuar projektin ambicioz të klubit portugez. Porto është në kërkim të një sulmuesi cilësor për të zëvendësuar mungesën e Samu. Nga ana e tij, Gimenez është shprehur i nderuar për interesimin e Portos, por ka bërë të qartë se do t'u përmbahet vendimeve të Milanit, i cili do të përcaktojë kushtet e mundshme të një transferimi. Javët e ardhshme pritet të jenë vendimtare për të ardhmen e sulmuesit meksikan, me Porton që duket e vendosur ta sjellë në Portugali.