Real Madridi ka arritur të zgjidhë një nga sagat kryesore të transferimeve të muajve të fundit. Vinicius Jr. do të mbetet me fanellën e bardhë deri në vitin 2032, pas një viti e gjysmë negociatash gjatë të cilave mosmarrëveshjet financiare krijuan dyshime për të ardhmen e brazilianit në "Santiago Bernabéu". Marrëveshja u zyrtarizua më 6 gusht, pas disa javësh gjatë të cilave Arsenali ishte shfaqur si një kërcënim serioz. Klubi londinez ishte i gatshëm të bënte një ofertë të fuqishme financiare për anësorin, me shpresën se ngërçi mes lojtarit dhe Real Madridit do të hapte derën për transferimin e tij. Në fund, Vinicius vendosi të qëndronte në Madrid. 30 milionë, një bonus firmosjeje dhe të drejtat e imazhit Negociatat nuk ngecën vetëm për shkak të pagës. Vinicius mendonte se, në moshën 26 vjeçare dhe duke hyrë në atë që e konsideronte kontratën vendimtare të karrierës së tij, ai meritonte kushte që pasqyronin rëndësinë e tij për ekipin. Kërkesa e tij fillestare ishte për një pagë neto prej rreth 30 milionë eurosh në sezon. Kësaj shume i shtohej edhe një bonus i konsiderueshëm për rinovimin, një nga pikat kryesore të mosmarrëveshjes gjatë bisedimeve. Lojtari kërkoi gjithashtu kushte më të mira lidhur me të drejtat e imazhit të tij. Nga ana e tij, Real Madridi kishte mbajtur një qëndrim shumë më të përmbajtur. Propozimi i bërë para arritjes së marrëveshjes parashikonte një pagë prej rreth 22 milionë eurosh në vit ,shifër të cilën Vinicius e kishte refuzuar fillimisht. Klubi nuk donte të krijonte një precedent me një bonus rinovimi jashtëzakonisht të lartë apo të cenonte ndjeshëm strukturën e pagave. Përfundimisht, Madridi u tërhoq nga qëndrimi i tij fillestar. Momenti vendimtar erdhi në fillim të muajit gusht. Pas një takimi mes palëve, Real Madridi e përmirësoi ofertën dhe arriti t'u afrohej kërkesave të brazilianit. Marrëveshja u finalizua përfundimisht me një kontratë që zgjat deri në vitin 2032. Ky akord përbën një përmirësim krahasuar me shumën prej 22 milionë eurosh që klubi kishte ofruar më parë, dhe paketa e përgjithshme financiare e tejkalon atë shifër, ndonëse shumat e sakta nuk janë bërë publike zyrtarisht. Diferenca krahasuar me kërkesat fillestare të Viniciusit nuk mund të shpjegohet vetëm me pagën. Në kontratën e re, një rol të rëndësishëm luajnë bonuset, dhe veçanërisht bonusi i rinovimit. Raportet sugjerojnë se paga vjetore është e kufizuar për shkak të strukturës së klubit dhe se janë pikërisht komponentët e ndryshueshëm e stimujt e tjerë ata që e rrisin ndjeshëm shumën totale që do të përfitojë lojtari. Një pakt heshtjeje Këtu del në pah një nga detajet më interesante të gjithë operacionit. Real Madridi dhe Vinicius kanë vendosur të mos i bëjnë publike shifrat përfundimtare të kontratës. Arsyeja është e thjeshtë: klubi nuk dëshiron që rinovimi i brazilianit të vendosë një standard të ri brenda dhomës së zhveshjes. Një bonus i majmë rinovimi mund t'u hapë rrugën lojtarëve të tjerë që të kërkojnë kushte të ngjashme kur të vijë momenti për të zgjatur kontratat e tyre. E njëjta gjë vlen edhe për pagën e tij. Bërja publike e shifrës përfundimtare mund të nxisë krahasime të reja me Mbappé,Bellingham dhe yjet e tjerë kryesorë të skuadrës.